一連多日都講左好多食既野. 好奈都無講風水, 今日又即管睇下自己電腦既相片, 有D相之前影落, 可以同大家分享一下既.

第一個要講既係上環西港城隔離既仙跡岩, 呢個位只係旺上畫同埋下畫, 晚間即劇變左死城:

佢既氣唔多好, 所以之前有幾間做食既都執左, 其中一間係叫木村拉麵. 鬼咩, 野又唔好食, 招呼又唔好, 都做到三年算係奇蹟啦!

另一方面, 當然係風水麻麻地, 大家睇下以下呢張相, 係在對面影番過去既:

留意地下讓既路牌, 這條路氣流雜亂無章, 係西港城地下既滿記都做唔掂, 好似都縮左位.

仙跡岩行既係環抱水, 車路彎彎而過, 舖位就像被人擁抱著一樣, 但由於是單邊位, 兩邊可以開口, 所以租都好貴, D人招呼又勁差, 我真係睇佢做得幾奈.

環抱水風水學黎講都唔錯, 但呢邊氣唔係幾好, 出面係海皮, 廢氣甚多, 車又多, 巴士又多, 行人路又窄, D人行過都要快行, 所以揀舖都唔好揀呢D!

再來一個遠鏡大家會看得清楚一點:

再離遠望望, 其實佢可以開斜門, 但佢無開, 夾硬開番正門:

樓上就係啟德大廈, 想當年我見佢大堂裝修過, 租寫字樓都有諗過下, 不過當時一心想只係要平租, 因為佢既風水真係麻麻. 第一, 門開係側邊, 行人路窄, 局限了入氣; 第二, 近海果邊死氣甚多.

一上到去, 個單位仲要望正條橋, 隔離又無景, 真係倒胃; 仲要係貴租, 真係唔係卦? 好彩拉尾都無租到!

第二度講既係我之前介紹過既海南雞飯, 呢條街既風水係四平八穩, 做食肯定無問題, 如果D野唔係太難入口, 一般情況下都可以做好奈.

氣比較乾淨, 亦唔係高速公路, 無搶氣情況, 人流OK, 車流亦可以, 唔算好密, 但亦唔係無車到果隻, 睇下隔離祥香, 我諗佢起碼都做左三十年:

權記都做左好奈! 有時候風水揀著呢D舖就包無失拖! 不過又話番轉頭, 如果你想租呢條街既舖的話, 等幾年都未必有, 因為甚少結業!

最後又睇下蒲飛路既麥當勞:

呢個我想同大家分享下佢既風水係幾咁唔好!

兩邊都收逆水, 氣流走哂! 我睇佢都唔係好賺到錢, 可能你話, 唔係喎! 佢成日都好多人喎! 係, 佢真係好多人, 但係再細心留意, 賓妹同老人家最多, 全部都係入去涼冷氣, 都唔食野既, 一坐就坐一個下畫! 西環特別多呢種情況!

咁你話佢有乜錢賺呢? 不過又唔見佢執笠?

佢地係大集團麻! 而家全部自己攞番哂黎做, 亦無做特許經營, 所以未必一定無錢賺就會結業.

有時睇野未必只睇表面, 好多野細心諗下就知道了, 都係一D常識來的. 大家繼續解碼啦!