今天晚上同龍嫂諗唔到有乜食，於是就去左中環既 Jenny。

呢間 Jenny，位置非常難搵，在利源西街中間上樓，但下午就好多人，晚上則無人。

環境不錯，最緊要冷氣夠，真係好夠，我夏天最怕熱，成噸冷氣係咁吹埋黎，成個雪櫃一樣，啱哂我呢！

睇下餐牌，有個二人套餐，甚合口味，就叫了這個：

最好係有數預，同埋叫呢個餐加十蚊有野飲，加三十有 wine 飲；諗起有個客去茶餐廳都問人有無 wine，即管試下：

酒非常順喉，味道非常香醇，我拉尾都可以一個人飲哂，都算係近幾年飲得最多呢次了。講出黎真係笑死人！

龍嫂叫青檸梳打，十蚊ＯＫ啦：

未上餐前有蝦片食，我以為係屈水招數，但埋單時看到都係十蚊，我直頭覺得抵食！

因為真係好味到停唔到口。佢地落左味粉，同埋有少少棘，甚為開胃！

法飽，好好味，香，飽唔太硬，有人話食法飽最緊要硬，我覺得反而軟少少易入口。

但我地無食哂，因為要食既野太多了：

頭盤黎個柚子沙律，我最欣賞係呢度菜：

點解呢？你睇佢份量幾大， 足有成個西柚既份量，我去崇光買，都要成三四十元了，仲要整埋俾你食。

個味道都幾特別的，有Ｄ酸，有Ｄ泰國味道；後來再細意品嘗一下，原來是有些蝦米，真係好有特色！

豆腐立魚湯，又係一個極好既菜式：

服務員叫我地趁熱飲，味道好濃，好大碗，有幾粒唔同既雜菇配襯下，真係唔錯！

每碗湯內裏都有兩隻蝦，好大隻！

仲要挑埋蝦腸，雖然唔係乜野貴價蝦，但都算誠意十足了，二百零蚊一個二人晚餐在中環咁貴租，仲想點呀？

小食，我亦係好欣賞。有蝦餅，春卷同埋雞串燒：

全部都做得非常之香口，亦係食到停唔到口！

主菜來了，本來叫咖喱雞肉，佢黎到變左咖喱牛腩，無所謂啦：

睇外表我覺得Ｄ咖喱好人工，應該唔係咁好味，點知剛巧相反，係好好味！

牛腩我反而覺得重正，因為唔硬，好腍，一咬即溶化，而且好入味！

份量又夠，大大舊，又好食，真係覺得好抵食！

炒通菜，本來唔差：

但我突然想起海外天，咁就明顯低左兩班，唔係話佢唔好食，只係海外天做得太好而已。

甜品，又係一絕：

紅豆糕加椰汁糕，每人每樣一件，正好為這個泰國晚餐劃上一個極完美的句號！

每人百零蚊，食到停唔到口，食物份量亦好夠，大家都好飽，仲有酒飲，簡直是人間美味！

珍妮泰菜館

地址: 中環利源東街利東大廈 2/F

電話: 21678588

必食推介: 立魚湯，咖喱牛腩，蝦餅，串燒

平均消費: 是次晚餐套餐加飲品連加一兩個人共 250 元

食物質素：　　　　
環境質素：　　　
服務質素：　　　
物值　　：　　　　    　

總評　　：　　　　　　五個太極，特登都去

（分數指南：以六個太極最好，無太極最差。）

　無太極：一生不去
一個太極：被迫才去
兩個太極：免費才去
三個太極：可以一去
四個太極：一定要去
五個太極：特登都去
六個太極：一生必去